Toshkent menejment va iqtisodiyot instituti va EUROASIA Insurance hamkorlik memorandumi imzoladi

Toshkent menejment va iqtisodiyot instituti hamda EUROASIA Insurance sug‘urta kompaniyasi o‘rtasida hamkorlik memorandumi imzolandi. Mazkur hujjat institut va sug’urta kompaniyaning hamkorlik dasturida ishtirok etishini nazarda tutadi. Oddiy qilib aytganda, bu kelishuv ta’lim va biznes o‘rtasidagi hamkorlikni rivojlantirishga qaratilgan.

EUROASIA Insurance — O‘zbekistondagi yetakchi sug‘urta kompaniyalaridan biri bo‘lib, 25 yildan ortiq tajribaga ega va 17 turdagi sug‘urta xizmatlarini taqdim etadi. Kompaniya zamonaviy raqamli yechimlarni faol joriy etmoqda hamda hamkorlik dasturlarini rivojlantirmoqda. Ushbu dastur doirasida ishtirokchilar shaxsiy promokod orqali sug‘urta mahsulotlarini tavsiya qilib, qo‘shimcha daromad olish imkoniyatiga ega bo‘ladilar.

Institut uchun ushbu hamkorlik amaliyotga yo‘naltirilgan ta’limni yanada kuchaytirish imkonini beradi. Talabalar nafaqat nazariy bilimlarni, balki sug‘urta bozori bilan ishlash bo‘yicha amaliy tajribani ham egallaydi, kommunikatsiya, savdo va moliyaviy savodxonlik ko‘nikmalarini rivojlantiradi.

Toshkent menejment va iqtisodiyot instituti iqtisodiyot, biznes, axborot texnologiyalari va boshqa dolzarb yo‘nalishlar bo‘yicha zamonaviy ta’limni yo‘lga qo‘ygan oliy ta’lim muassasasidir. Institut talabalarni mehnat bozorida talab yuqori bo‘lgan mutaxassislar sifatida tayyorlashga alohida e’tibor qaratadi.

Imzolangan memorandum tomonlarning uzoq muddatli hamkorlikni rivojlantirish, talabalar uchun yangi imkoniyatlar yaratish va ularning professional rivojiga hissa qo‘shishga bo‘lgan intilishini tasdiqlaydi.