O'zbekcha
EUROASIA INSURANCE bosh ofisida PVI Insurance delegatsiyasining ishchi tashrifi bo‘lib o‘tdi. PVI Insurance Vetnamning umumiy sug‘urta sohasidagi eng yirik kompaniyasidir.
Delegatsiyaga PVI Insurance Bosh direktorining o‘rinbosari Le Hong Linh xonim boshchilik qildi. U kompaniyada qayta sug‘urtalash yo‘nalishiga mas’ul. Uchrashuvda SOULUS hamda Blue Mountain Capacity (BMC) kompaniyalari vakillari ham ishtirok etdi. BMC — EUROASIA INSURANCE Kuzatuv kengashi a’zosi Devid Flintning Londondagi kompaniyasi bo‘lib, Lloyd’s bozorida vakolatli agent (coverholder) hisoblanadi.
Uchrashuvda EUROASIA INSURANCE nomidan Kuzatuv kengashi raisi Bobur Shadiyev, Kuzatuv kengashi a’zolari hamda kompaniya ijroiya organi vakillari qatnashdi.
PVI Insurance haqida
PVI Insurance 1996-yilda tashkil etilgan va bugungi kunda Vetnamning umumiy sug‘urta bozorida birinchi o‘rinni egallaydi: 2026-yilning birinchi choragi yakunlariga ko‘ra uning bozordagi ulushi 19,4 foizga yetdi. 2025-yilda PVI Vetnamning umumiy sug‘urta kompaniyalari orasida birinchi bo‘lib yillik daromadi 1 milliard AQSh dollaridan oshgan kompaniyaga aylandi. PVIning strategik aksiyadori — Germaniyaning HDI Global SE kompaniyasi (Talanx guruhi).
Kompaniya energetika va neft-gaz sohasi, mol-mulk, qurilish-montaj, dengiz va aviatsiya risklarini sug‘urtalashga ixtisoslashgan. PVI qayta sug‘urtalash bilan faol shug‘ullanadi va energetika risklarini bevosita London bozorida joylashtira oladi. 2023-yilda kompaniya AM Best agentligidan A- (Excellent) moliyaviy barqarorlik reytingini olgan va shundan beri uni har yili tasdiqlab kelmoqda, oxirgi marta reyting 2026-yil mart oyida tasdiqlangan. 2025-yilda PVI InsuranceAsia News mukofotida yilning eng yaxshi raqamli sug‘urtachisi (Best Digital Insurer of the Year) deb e’tirof etildi.
Raqamli transformatsiya va investitsiya faoliyati
Tashrif davomida mehmonlarga EUROASIA INSURANCE faoliyati, kompaniyaning asosiy rivojlanish yo‘nalishlari va strategik tashabbuslari haqida batafsil ma’lumot berildi. EUROASIA INSURANCEni to‘laqonli raqamli sug‘urta kompaniyasiga aylantirish jarayoniga alohida e’tibor qaratildi.
Mehmonlarga kompaniyaning investitsiya faoliyati ham taqdim etildi: investitsiya portfelini boshqarishning asosiy yo‘nalishlari va moliyaviy resurslardan samarali foydalanish bo‘yicha yondashuvlar.
Hamkorlik istiqbollari
Muzokaralar davomida tomonlar o‘zaro hamkorlikning joriy holati va istiqbollarini, qo‘shma tashabbuslarni amalga oshirish imkoniyatlarini muhokama qildi, shuningdek sug‘urta bozorining rivojlanish tendensiyalari va kompaniyalar o‘rtasidagi professional aloqalarni kengaytirish yuzasidan fikr almashdi.
Xalqaro sug‘urta va texnologik kompaniyalar bilan hamkorlik EUROASIA INSURANCEning uzoq muddatli strategiyasidagi muhim yo‘nalishlardan biridir. Bunday hamkorlik ilg‘or tajribani o‘rganish, zamonaviy sug‘urta texnologiyalarini joriy etish, yangi mahsulotlarni rivojlantirish hamda risklarni boshqarish standartlarini takomillashtirishga yordam beradi.
PVI Insurance va boshqa xalqaro sheriklar bilan o‘zaro aloqalar tajriba almashish, professional salohiyatni oshirish va qo‘shma loyihalarni amalga oshirish uchun imkoniyat yaratadi. Bu EUROASIA INSURANCEning xalqaro aloqalarini mustahkamlaydi, kompaniyaning xalqaro sug‘urta bozoridagi ishtirokini kengaytiradi va ichki bozordagi mavqeini kuchaytiradi.
Kompaniyalar o‘rtasida hamkorlik aloqalari avvaldan mavjud: 2026-yil yanvar oyida EUROASIA INSURANCE PVI Insurance kompaniyasini tashkil topganining 30 yilligi bilan tabrikladi.
PVI Insurance delegatsiyasining tashrifi xalqaro hamkorlikni rivojlantirish yo‘lidagi muhim qadam bo‘ldi. EUROASIA INSURANCE xalqaro hamkorlikni kengaytirish hamda zamonaviy sug‘urta va raqamli yechimlarni joriy etishni izchil davom ettirib, kompaniyaning barqaror rivojlanishi uchun mustahkam poydevor yaratmoqda.
